Elano þreyttur á að vera í kuldanum

Brasilíski miðjumaðurinn Elano er þreyttur á því hve fá tækifæri hann fær hjá Manchester City eftir að Mark Hughes tók við liðinu. Elano lék lykilhlutverk undir stjórn Sven Göran Eriksson á síðasta tímabili.

„Það er mjög erfitt að sætta sig við það að spila ekki. Ég get ekki leynt vonbrigðum mínum fyrir stuðningsmönnum eða stjórnarmönnum. Ég tel mig búa yfir nægilegum gæðum til að spila," sagði Elano.

„Ég virði knattspyrnustjórann og held minni vinnu áfram en þetta er erfitt. City ætlar sér stóra hluti og ég vil taka þátt í þeim."