Borinn út á Bergþórshvoli

Héraðsdómur Suðurlands hefur kveðið upp þann úrskurð að maður skuli ásamt öllu því sem honum tilheyrir borinn út úr bílskúr, vélageymslu, eldhúsi, þvottahúsi og aðliggjandi gangi á neðri hæð íbúðarhússins að Bergþórshvoli 2 í Rangárþingi eystra.

Maðurinn seldi fólki húsið en samkvæmt kaupsamningi má hann búa í húsinu eins lengi og hann vill enda tengdur kaupendunum. Töluverðar deilur eru þó í málinu og telur sá sem borinn var út að kaupsamningurinn hafi ekki verið efndur að fullu og því eigi fólkið ekki þau réttindi sem það héldi fram í þessu máli.

Hins vegar komst dómurinn að því út frá gögnum málsins að fólkið hefði efnt samninginn. Sá hluti málsins á enn eftir að fara fyrir Hæstarétt en héraðsdómur hafnaði öllum kröfum mannsins.

Í dómnum í dag var aðeins tekin afstaða til þess hvort eignarheimild fólksins væri svo skýr að hægt væri að bera manninn út. Taldi dómurinn að þrátt fyrir að afsal hefði ekki gefið út fyrir eigninni væri réttur kaupendanna svo skýr að bera mætti manninn út bílskúr, vélageymslu, eldhúsi, þvottahúsi og aðliggjandi gangi á neðri hæð íbúðarhússins að Bergþórshvoli 2.