„Fulltrúi sýslumanns ætti að kynna sér lögin“

„Til að byrja með ætti þessi fulltrúi sýslumanns að kynna sér lögin áður en hann fer að gaspra í fjölmiðlum," segir Erlendur Þór Gunnarsson, lögmaður Helga Rafns Brynjarssonar. Helgi hefur kært hundrað manns fyrir ummæli sem féllu á Netinu í kjölfar Lúkasarmálsins svokallaða. Eyþór Þorbergsson, lögfræðingur hjá Sýslumanninum á Akureyri sagði í samtali við Vísi í dag að stór hluti kærunnar varðaði ærumeiðingar, sem ekkert erindi ættu á borð sýslumanns.

„Ég bendi honum vinsamlegast á 242. grein almennra hegningarlaga, c-lið," segir Erlendur, en þar segir: „Hafi ærumeiðandi aðdróttun verið borin fram skriflega, en annaðhvort nafnlaust eða með rangri eða tilbúinni undirskrift, skal brotið sæta opinberri ákæru, ef sá krefst þess, sem misgert var við."

„Þetta er kristaltært og því ætti þessi maður að einbeita sér að rannsókn málsins í stað þess að standa í svona rugli," segir Erlendur að lokum.