Framtíð peningamála verði rædd eftir að erfiðleikar eru yfirstaðnir

Björgvin G. Sigurðsson viðskiptaráðherra segir óvarlegt að gagnrýna Seðlabankann í þeirri stöðu sem nú er uppi í efnahagslífinu. Hann vill að menn komist í gegnum þann öldudal sem efnahagslífið er í nú og ræði síðan framtíð peningamála í landinu.

Björgvin var gestur í hádegisviðtali Markaðarins í dag. Þar var hann meðal annars spurður um hvers vegna ríkisstjórnin hefði ekki brugðist við aðstæðum í efnahags- og atvinnulífi. Hann benti hins vegar á að ýmislegt hefði verið gert. Til stæði að lækka tekjuskatt fyrirtækja og hækka persónuafslátt og þá hefði hann lagt fram frumvarp sem auðveldaði félögum skráningu í erlendri mynt.

Um gagnrýni þess efnis að ríkisstjórnin gripi ekki inn í ástandið sagði Björgvin að ríkisstjórnin hefði ekki tæki til að grípa inn í þróunina sem ætti rætur sínar á alþjóðlegum markaði. Menn hefðu ákveðna tilhögun í peningamálum og ekki yrði hlaupið frá henni vegna ágjafar á bátinn. Menn hefðu lengi bent á það að gengi krónunnar hefði verið alltof hátt skráð og vitað væri að gengið myndi lækka. Vonast hefði verið eftir því að það gerðist hægt og því hefði vaxtastigið verið svo hátt hjá Seðlabankanum.

Skortir yfirsýn yfir stöðuna

Björgvin sagði erfitt að meta ástandið inni í sveiflunni sjálfri og menn vantaði yfirsýnina. Meðan þessi miklu vandræði, þessi taugaveiklun væri á markað myndi verða óróleiki á íslenskum fjármálamörkum.

Björgvin sagði aðspurður að mikill þungi væri í umræðu um framtíðarfyrirkomulag gjaldeyrismála. „Umræðan er þung, hún er mikil, hún er alls staðar," sagði Björgvin og vísaði meðal annars til Samtaka atvinnulífsins, Samtaka iðnaðarins og Viðskiptaráð.

Samfylkingin hefði markað sér þá stefnu að ganga ætti inn í Evrópusambandið en dómsmálaráðherra hefði í Mannamáli á Stöð 2 á sunnudag bent á að það þyrfti vegvísi í málinu, til að mynda hvort þjóðaratkvæðagreiðsla ætti að vera um bæði aðildarviðræður og aðildina sjálfa.

Björgvin sagðist telja að stærstir ávinningurinn af inngöngu í ESB væri aðild að myntbandalaginu en ekki væri gott að taka umræðu um það þegar ástandið væri eins og nú. Það skipti máli að halda ró sinni og komast í gegnum erfiðleikana og þegar það væri afstaðið væri hægt að ræða framtíðarfyrirkomulag peningamála.