Lífið

Dr. Gunni óhress með lélegt myndband við Gamla góða Villa

Sigríður Elva Vilhjálmsdóttir skrifar
Gunnar Lárus Hjálmarsson, betur þekktur sem Dr Gunni er ekki hrifinn af myndbandi sem hefur verið gert við eitt laga hans „Gamli góði Villi". Myndbandið, sem er komið á YouTube, samanstendur að mestu úr myndbroti af Vilhjálmi Þ. Vilhjálmsyni fyrrverandi og mögulega verðandi borgarstjóra á frægum blaðamannafundi í Valhöll á dögunum.

„Það er kannski óþarfi að vera að hamra svona á því augljósa" segir Gunni, en lagið er mikil ádeila á havaríið í borgarpólitíkinni undanfarnar vikur. Hann segir þó að kannski megi líta á að sem ákveðinn heiður að einhver búi til myndband við lagið þó það sé slappt.

Hægt er að sækja fjögurra laga plötu sem inniheldur meðal annars „Gamla góða Villa" á heimasíðu Gunna og hafa um tvöþúsund manns sótt hana þar. Þá hafa rúmlega þrjúþúsund manns horft á myndbandið og platan því komin langleiðina í gull, svona þannig lagað séð. Einnig hefur verið hægt að panta geisladisk á heimasíðunni, og fær fólk hann þá sendann innpakkaðann og fínan inn um lúguna.

Gunni segir þó hafa mátt standa betur að þeim málum. „Ég var svo vitlaus að hafa umslagið svart, þannig að það spænist upp blekið í prentaranum," segir Gunni. „Ég hefði betur haft þetta hvítt. Ég vona bara að sem fæstir kaupi hann." Þegar hafa þó 38 manns gert það, þar á meðal ýmist mektarfólk sem tengist málinu beint. Hverjir það eru neitar Gunni þó að upplýsa um. „Ég heiðra þagnarskylduna," segir Gunni leyndardómsfullur.

Lagið og myndbandið hafa þó hlotið blendnar viðtökur netverja. Ummælakerfið á YouTube logar og líflegar umræður hafa spunnist um málið á Barnalandi.

Gunni er með böggum hildar vegna neikvæðu ummælanna. „Jú jú, þetta er eins og stunga í hjartað í hvert skipti sem fólk segir að ég sé óþroskaður" segir Gunni, en segist þó reyna að hugga sig við jákvæðu ummælin. Sjálfum finnst honum hann alls ekki hafa farið yfir strikið. „Ég er ekki að ljúga neinu," segir Gunni, og tekur sem dæmi tal í laginu um hártoppa og geðsjúkdóma. „Sjálfur er ég sköllóttur svo ég er í fullum rétti að tala um það. Eins og hommar mega gera hommagrín. Svo hef ég, eins og megnið af þjóðinni, átt við ýmsa geðsjúkdóma að etja svo ég er á heimavelli.



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.