Húsið hennar Lyudmilu

Henni Lyudmilu Matemyanovu brá heldur betur í brún þegar hún kom heim til sín úr fríi. Ekki það að það hefði verið brotist inn hjá henni, eða unnar skemmdir.

Húsið var horfið í heilu lagi. "Það var ekkert eftir. Ekki einn einasti steinn" sagði Lyudmila í samtali við rússneska sjónvarpið.

Hún fór náttúrlega að grennslast fyrir um húsið og komast að því að byggingafyrirtæki hafði farið húsavillt. Rifið húsið hennar í staðinn fyrir annað hús í annarri götu.

Verktakinn bauð henni bætur en Lyudmilu þótti þær alltof lágar fyrir heilt hús með fullu innbúi. Hin húsnæðislausa húsmóðir hefur því höfðað mál gegn fyrirtækinu.