Byssumenn sleppa börnum úr gíslingu

Byssumenn sem tóku 250 börn í gíslingu í bænum Bannu norðvesturhluta Pakistans hafa sleppt þeim öllum og gefist upp.

Um var að ræða sjö menn sem lent höfðu í átökum við lögreglu og flúið inn í skólann. Her og lögregla umkringdi skólann og heimtuðu mennirnir í fyrstu að þeim yrði tryggð örugg leið út af svæðinu. Eftir að ættbálkahöfðingjar á svæðinu höfðu miðlað málum var börnunum sleppt og gáfust menninir upp.

Ekki liggur fyrir hvort mannræningjarnir voru á vegum tiltekins baráttuhóps en herskáir stuðningsmenn talibana hafa í síauknum mæli látið til sín taka á þessu svæði.