Havant & Waterlooville skoraði tvö á Anfield en tapaði

Utandeildarliðið Havant & Waterlooville komst í dag í sögubækurnar með því að komast tvívegis yfir gegn stórliði Liverpool á Anfield í ensku bikarkeppninni í dag.

Á endanum vann Liverpool 5-2 sigur eftir að staðan var jöfn í hálfleik, 2-2.

Leikur liðanna var einhver sá ótrúlegasti í sögu bikarkeppninnar.

Afrek H&W var nógu ótrúlegt fyrir en það leikur í sjöttu efstu deild í Englandi og komst þrátt fyrir það í 32-liða úrslit ensku bikarkeppninnar.

Það drógst svo gegn Liverpool og það á útivelli sem þýddi að leikmenn liðsins fengu óvænt tækifæri til að leika á Anfield Road, sem flesta knattspyrnumenn heimsins dreymir um að fá að gera.

En þar með var sögunni ekki lokið þó að fyrir leikinn hefðu langflestir átt von á öruggum sigri Liverpool enda eitt fjögurra stórliða Englands og eitt sterkasta félagslið Evrópu.

Liðið hefur þó átt í ýmis konar vandræðum á undanförnum vikum í tengslum við eigendur liðsins og þá hafa fjármál félagsins verið í nokkurri óvissu.

Framtíð knattspyrnustjórans, Rafael Benitez, hefur einnig verið í óvissu og allt hefur þetta haft áhrif á leikmenn liðsins.

En engin bjóst við því sem gerðist á Anfield í dag, sama hvað á undan hefði gengið.

Á áttundu mínútu leiksins komst H&W yfir með skalla Richard Pacquette eftir hornspyrnu. Hann var skilinn eftir einn og óvaldaður og nýtti tækifærið vel.

Eftir þetta létu stuðningsmenn H&W vel í sér heyra og stríddu stuðingsmönnum Liverpool mikið á þessu. Þeir urðu að taka því þegjandi og hljóðalaust.

John Arne Riise átti skömmu síðar skot yfir mark H&W en leikmenn utandeildarliðsins voru ekki búnir að segja sitt síðasta.

Þeir hefðu getað komist 2-0 yfir ef Neil Sharp hefði nýtt dauðafærið sem hann fékk í vítateig Liverpool.

Á 27. mínútu tókst þó heimamönnum að jafna metin. Lucas Leiva var þar að verki með glæsilegu skoti rétt utan vítateigs.

Héldu margir að þar með væri öskubuskuævintýri H&W lokið. Alls ekki.

Áhugamennirnir náðu aftur forystunni eftir að Alfie Potter skaut að marki á 31. mínútu og fór boltinn af Martin Skrtel í mark Liverpool. Markið skráðist sem sjálfsmark á Skrtel.

Í þetta sinn liðu þrettán mínútur þar til Liverpool jafnaði metin á nýjan leik. Atvinnumennirnir stóðu þá undir nafni og fóru illa með vörn H&W sem lauk með því að Yossi Benayoun skoraði jöfnunarmarkið.

Staðan því 2-2 í hálfleik en Havant & Waterlooville hafði haft forystuna í samtals 32 mínútur í hálfleiknum.

Það tók Liverpool 56 mínútur að ná loksins forystunni í leiknum. Jermaine Pennant átti fyrirgjöf fyrir mark H&W og Benayoun sem þrumaði knettinum í slána og inn.

Þremur mínútum síðar fullkomnaði Benayoun þrennuna. Boltinn barst til hans eftir skot Ryan Babel og skilar Ísraelinn knettinum örugglega í markið.

Um leið gerði Benayoun út um vonir H&W sem gerðu sitt besta til að forðast enn stærra tap. Þeir voru meira að segja nálægt því að skora þriðja markið en undir lok leiksins bætti Liverpool við fimmta markinu. Peter Crouch var þar að verki  

En miðað við hvernig leikurinn þróaðist eru úrslit hans í sjálfu sér aukaatriði. Havant & Waterlooville komst tvívegis yfir gegn Liverpool á einhverjum sögufrægasta knattspyrnuvelli heims og því munu leikmenn og stuðningsmenn liðsins aldrei gleyma.

Né heldur leikmenn og stuðningsmenn Liverpool - það er fullvíst.