Clinton og Obama takast harkalega á

Hillary Clinton og Barack Obama sem berjast um útnefningu Demókrataflokksins fyrir forsetakosningarnar í nóvember, tókust harkalega á í kappræðum fyrir forkosningarnar í Suður-Karólínu. Obama sakaði Clinton um að segja hvað sem er til að fá atkvæði.

Á sunnudag sakaði hann Bill Clinton eiginmann hennar um að fara með rangt mál þegar hann talaði um framboð sitt. Hillary svaraði því til að það væri afar erfitt að eiga rökræður við mann sem tæki aldrei ábyrgð á eigin orðum. Þriðji frambjóðandinn, John Edwards sakaði þau um að rífast.

Þremenningarnir rökræddu einnig efnahagsástand og kynþáttaréttlæti. Þeir gagnrýndu Bush forseta fyrir að berjast ekki gegn samdrætti í efnahagslífinu.

Obama þarf að vinna á laugardaginn í forkosningunum í Suður-Karólínu til að hressa upp á baráttu sína eftir að hafa tapað nokkrum sinnum í röð fyrir fyrrverandi forsetafrúnni, fyrst í New Hampshire, svo Michigan og þá Nevada.