Ísraelar slaka örlítið á einangrun Gaza

Ísraelsstjórn hefur ákveðið að gefa aðeins eftir í einangrun sinni á Gaza-svæðinu eftir mikinn alþjóðlegan þrýsting. Leyft hefur verið að flytja eldsneyti og lyf inn á Gazasvæðið og dugir eldsneytið til að keyra raforkuverin á Gaza á 30% afköstum í eina viku.

Þar að auki fá sjúkrahúsin á Gaza aukaeldsneyti til að keyra díselrafvélar sínar. Þessar tilslakanir eru þó aðeins bundnar við daginn í dag.

Rafmagn fór af stórum hluta Gaza-svæðisins og matvæli skorti eftir landamæralokun Ísraela í refsingarkyni fyrir sprengjuárásir frá Gaza á hús landnema. Alþjóðasamfélagið brást ókvæða við - þar á meðal Íslendingar.

Mannúðarsamtök segja tilslökun Ísraela ekki duga. Hún fresti aðeins vandamálinu. Ísraelar benda hins vegar á að lokun landamæranna hafi orðið til að fækka flugskeytaárásum - þó ein slík hafi verið gerð í morgun.