Fidel Castro í framboði til þings á Kúbu

Fidel Castro, hinn aldni leiðtogi Kúbu, er meðal þeirra sem bjóða sig fram til þings í kosningum sem fram fara í landinu í dag. Þetta gerir hann þrátt fyrir að hann hafi ekki sést opinberlega í um eitt og hálft ár eða frá því að hann veiktist heiftarlega.

Engin kosningarbarátta var heimiluð enda er Kommúnistaflokkurinn einn flokka í landinu. Þannig bjóða 614 manns sig fram til setu í 614 sæta þingi landsins en búist er við að kosningaþátttaka verði nálægt 90 prósentum.

Óvissa hefur verið um það hvort Fidel Castro gegni áfram embætti forseta í landinu. Raul, bróðir hans, hefur haldið um stjórnartaumana frá því að Fidel veiktist. Forsetinn aldni hefur ýjað að því að kominn sé tími til að annar taki við völdum í landinu en hann hefur setið á forsetastóli á Kúbu í hartnær hálfa öld.

Eftir þingkosningarnar mega líða 45 dagar þar til þingið kemur saman og velur forseta landsins og ríkisráð. Haft eftir Raul Castro að þingið komi saman þann 24. febrúar til þess að taka ákvörðun um hvort bróðir hans verði áfram forseti.

Töluverð endurnýjun verður í þingliði Kúbu samkvæmt frétt breska ríkisútvarpisins. Hafði Kommúnistaflokkurinn hvatt yngra fólk til að bjóða sig fram. Nærri tveir þriðju frambjóðenda setjast nú á þing í fyrsta sinn og er meirihluti þeirra undir fimmtugu.