Þyngri dómar í Hæstarétti Noregs vegna málverkaráns

Hæstiréttur þyngdi í dag dóma yfir tveimur mönnum sem ákærðir voru fyrir ránið á málverkunum Ópinu og Madonnu af Munch-safninu í Osló í ágúst 2004. Máli eins manns var vísað aftur til undirréttar.

Sá sem þyngstan dóm hlaut fékk tíu og hálfs árs fangelsi en hann hafði áður fengið níu og hálfs árs dóm. Annar fékk sex ára fangelsisdóm fyrir aðild sína að ráninu sem var þynging um hálft ár. Mál manns, sem dæmdur var til níu ára fangelsisrefsingar, var vísað aftur í undirrétt vegna galla á málsmeðferð.

Málverkunum Madonnu og Ópinu, sem eru meðal þekktustu verka norska listamannsins Edvards Muchs, var rænt af Munch-safninu um hábjartan dag fyrir þremur og hálfu ári. Málverkanna var lengi leitað og fundust þau að lokum töluvert illa farin. Verið er að gera við þau nú.