Efna til frekari mótmæla í Kenía

Helsti stjórnarandstöðuflokkur Kenía hyggur á frekari mótmælaaðgerðir eftir misheppnaðar tilraunir til málamiðlunar eftir umdeildar forsetakosningar í landinu. Tilkynning þess efnis var gefin út eftir að málamiðlunarviðræður undir stjórn John Kufuor forseta Ghana og yfirmanns Afríkubandalagsins sigldu í strand.

Kufuor er stjórnarformaður Afríkubandalagsins og hefur nú yfirgefið Kenía eftir misheppnaða tilraun til að fá stjórnarandstöðuleiðtogann Raila Odinga til að hitta Mwai Kibaki forseta.

Að minnsta kosti 600 manns létust í óeirðum í kjölfar forsetakosninganna 27. desember þar sem Odinga sakaði Kibaki forseta um kosningasvindl.

Lögreglan hefur bannað alla fjöldafundi.

Fréttaritari BBC í Naíróbí segir að fyrirhugaðir mótmælafundir sýni aukna gremju stjórnarandstöðuflokks Odinga.

Salim Lone talsmaður flokksins sagði að meðlimir hans muni fjölmenna á lögreglustöð höfuðborgarinnar og krefjast leyfis fyrir fjöldafundi næstkomandi miðvikudag.

„Ríkisstjórnin hefur ekki áhuga á málamiðlun krísunnar í landinu okkar," sagði hann fréttastofu AFP.

Jendayi Frazer helsti sendifulltrúi Bandaríkjanna í Afríku og fjórir fyrrverandi forsetar Afríkulýðvelda hafa verið í Kenía til að reyna að miðla málum og binda endi á ástandið í landinu sem þjónar lykilhlutverki í stöðugleika Austur-Afríku.