Rasmussen vill skipta olíugróðanum jafnt

Danir og Grænlendingar ættu að skipta til helminga tekjum af olíu sem hugsanlega er að finna á Grænlandi, segir Anders Fogh Rasmussen, forsætisráðherra Danmerkur. „Ég held að hægt sé að finna lausn sem þjóni báðum aðilum. Lausn sem myndi þýða að hugsanlegum tekjum yrði skipt jafnt,“ sagði Rasmussen við Ritzau fréttastofuna.

Rasmussen sagði að nýta ætti tekjurnar til að draga úr fjárstuðningi Dana við Grænland sem nemur hátt í 40 milljörðum íslenskra króna. Efnahagur Grænlendinga er að mestu leyti háður fiskveiðum og fjárstuðningi frá Danmörku og ljóst að viðræður um sjálfstæði Grænlands veltur mikið á því hvernig hægt er að skipta olíugróða.