United og Barcelona í undanúrslit

Manchester United vann ellefta sigur sinn í röð á heimavelli í Meistaradeildinni í kvöld en það er met. Liðið vann Roma 1-0 og kemst því í undanúrslitin á 3-0 sigri samtals.

Liðið mætir Barcelona í undanúrslitum en Börsungar unnu 1-0 sigur á Schalke í kvöld, rétt eins og þeir gerðu í Þýskalandi.

Manchester United - Roma 1-0 (Samtals 3-0)

Carlos Tevez skoraði eina mark leiksins í kvöld með skalla eftir magnaða fyrirgjöf Owen Hargreaves á 70. mínútu.

Gary Neville, fyrirliði Manchester United, kom inn sem varamaður á 80. mínútu en hann hefur verið frá í þrettán mánuði og fékk góðar mótttökur á Old Trafford.

Fyrri hálfleikur var mjög opinn og skemmtilegur og í raun ótrúlegt að ekkert mark hafi verið skorað.

Eftir hálftíma leik fékk Roma vítaspyrnu þegar Wes Brown var talinn hafa brotið á Mancini. Umdeildur dómur en De Rossi skaut himinhátt yfir úr spyrnunni.

Heimamenn áttu nokkrar mjög hættulegar sóknir í fyrri hálfleik og voru talsvert betri. Carlos Tevez, Park Ji-Sung og Owen Hargreaves fengu mjög góð færi en ekki náð að hitta á rammann.

Sir Alex Ferguson gerði fimm breytingar á byrjunarliðinu frá fyrri leiknum. Rio Ferdinand var í byrjunarliðinu en Wayne Rooney og Cristiano Ronaldo byrjuðu á varamannabekknum.

Barcelona - Schalke 1-0 (Samtals 2-0)

Undir lok fyrri hálfleiks skoraði Yaya Toure eina mark leiksins fyrir Börsunga og ljóst að þýska liðið þurfti að skora tvívegis. Það gerðist hinsvegar ekki og Barcelona vann 2-0 sigur samtals.

Eiður Smári Guðjohnsen byrjaði á varamannabekk Börsunga en kom inná í uppbótartíma.