Guðjón sagður líklegastur

The Daily Record í Skotlandi heldur því fram í dag að Guðjón Þórðarson sé líklegastur til að verða ráðinn knattspyrnustjóri Hearts en nýr stjóri verði ráðinn á næstu tíu dögunum.

Guðjón sagði í viðtali á Vísi í gær að hann væri til í að skoða þann möguleika að taka við Hearts ef forsendurnar væru réttar. Ólafur Garðarsson umboðsmaður sér um hans mál í Skotlandi.

Hann er þó ekki sá eini sem er orðaður við Hearts en það eru þeir Vladimir Weiss, stjóri Artmedia Bratislava í Slóvakíu og Andrei Zygmantovic, fyrrum stjóri Kaunas í Litháen.

Blaðið segir þó að Guðjón sé líklegastur af þeim þremur til að taka við Hearts.