Rieira: Verðum enn betri með Torres

Albert Rieira, vængmaður Liverpool, varar andstæðinga Liverpool við því að liðið eigi bara eftir að verða betra á nýju ári þegar Fernando Torres snýr úr meiðslum. Torres er að jafna sig á meiðslunum og ætti að snúa aftur í næstu leikjum.

„Allir vængmenn, reyndar allir leikmenn, vilja spila með leikmanni eins og Fernando. Hann er alveg frábær leikmaður og mikilvægur fyrir liðið. Hann skoraði 33 mörk á síðasta tímabili sem er magnað afrek í svona erfiðri deild," sagði Rieira.

„Það verður gott fyrir okkur þegar hann verður leikfær aftur. Ég er viss um að ég mun ná vel saman með honum á vellinum. Ég þekki hann vel frá því að við spiluðum saman í unglingaliðum Spánar," sagði Rieira. „Við getum samt ekki notað það sem afsökun að við séum ekki með Fernando. Við erum með góða sóknarmenn sem geta leyst hans stöðu."