Heiðar nú orðaður við Norwich

Heiðar Helguson hefur verið orðaður við enska B-deildarliðið Norwich í enskum fjölmiðlum í dag.

Heiðar er sem stendur samningsbundinn Bolton í ensku úrvalsdeildinni en hann hefur átt við þrálát meiðsli að stríða og er nú að jafna sig eftir enn ein meiðslin.

Hann kom lítið sem ekkert við sögu á síðasta keppnistímabili hjá Bolton og var fyrr í sumar orðaður við bæði Charlton og Nottingham Forest.

Þjálfari Norwich er Glenn Roeder. Hann hefur verið að leita af nýjum framherja og var Steffen Iversen sagður efstur á óskalista hans. Sá norski ku hins vegar ekki vera til sölu hjá Rosenborg.

Roeder mun því næst hafa snúið sér að Heiðari sem sagði fyrr í sumar að hann vissi ekki betur en að hann yrði áfram í herbúðum Bolton.