Cole bjargaði arfaslökum Englendingum

Joe Cole var hetja Englendinga í kvöld þegar hann skoraði bæði mörk liðsins í 2-0 sigri á smáliði Andorra í undankeppni HM. Leikurinn var nánast endurtekning á síðustu viðureign liðanna þar sem stuðningsmenn enska liðsins bauluðu á sína menn í hálfleik í stöðunni 0-0.

Enska liðið mætir fjendum sínum frá Króatíu í næsta leik á miðvikudaginn og hætt er við því að lærisveinar Fabio Capello verði að leika betur þá ef ekki á illa að fara.

Leikurinn gefur ekki góð fyrirheit fyrir enska landsliðið sem legið hefur undir mikilli gagnrýni fjölmiðla fyrir slakan leik.

Andorra er í 186. sæti Fifa-listans, en líkt og í viðureign þessara liða í mars í fyrra, var fótboltinn sem boðið var upp á á Spáni í dag ekki mikið fyrir augað.