Boltavaktin á öllum leikjum dagsins

Sjötta umferð Landsbankadeildar karla lýkur í dag með fimm leikjum sem verða allir í beinni lýsingu á Boltavakt Vísis og Fréttablaðsins.

Miðstöð Boltavaktarinnar safnar saman öllum helstu upplýsingunum úr öllum leikjunum fimm og birtir jafnóðum á sama staðnum. Á henni má einnig komast inn á Boltavakt hvers leiks. Slóð Miðstöðvarinnar er visir.is/boltavakt.

Leikur Keflavíkur og KR verður í beinni sjónvarpsútsendingu á Stöð 2 Sporti en allir leikirnir hefjast klukkan 14.00.

KR-ingar unnu góðan og sannfærandi sigur á Fram á síðustu umferð og ætla sér sjálfsagt að fylgja honum eftir í Keflavík í dag. KR er í áttunda sæti deildarinnar og ætla sér sjálfsagt ofar en það.

Keflvíkingar töpuðu hins vegar sínum fyrsta leik í síðustu umferð og um leið sínum fyrstu stigum á mótinu. Það er því mikilvægt að ná sér aftur á strik sem fyrst enda misstu þeir um leið toppsætið til FH-inga.

Fram og Grindavík eigast við á Laugardalsvellinum en bæði lið töpuðu sínum leikjum í síðustu umferð. Grindavík er í næstneðsta sætinu en Fram í því fjórða eftir góða byrjun á mótinu.

Guðjón Þórðarson verður í leikbanni í dag er hans menn í ÍA mæta í heimsókn til HK-inga.

HK vann frábæran 4-2 sigur á Íslandsmeisturum Vals í síðustu umferð en það var fyrsti sigur liðsins á mótinu. Liðið er þó enn í botnsæti deildarinnar með þrjú stig, rétt eins og Grindavík.

ÍA tapaði fyrir Fylki á heimavelli í síðustu umferð í miklum rokleik á Skipaskaga. Skagamenn eru einungis með fjögur stig og ætluðu sér vitanlega stærri hluti áður en mótið hófst en tíunda sætið.

Á Vodafone-vellinum verður hörkuleikur er Valur tekur á móti Breiðablik. Blikar eru í sjötta sæti og Valsmenn í því níunda en bæði lið hafa verið langt frá sínu besta í upphafi mótsins. Þetta er því kjörið tækifæri fyrir bæði lið að koma sér aftur á rétta braut.

Að síðustu tekur topplið FH á móti spútnikliði Fjölnis. Þetta eru liðin í fyrsta og þriðja sæti og samkvæmt því stórleikur umferðarinnar. FH-ingar eru enn taplausir en Fjölnismenn hafa tapað síðustu tveimur leikjum sínum eftir öfluga byrjun.

Ef Fjölnismenn tapa aftur í dag gæti hrapið niður stigatöfluna orðið ansi hratt og harkalegt.