Diouf búinn að skrifa undir

Sunderland hefur formlega gengið frá kaupunum á El-Hadji Diouf frá Bolton. Kaupverðið er 2,5 milljónir punda og skrifaði leikmaðurinn undir samning til fjögurra ára.

Roy Keane knattspyrnustjóri Sunderland sagði að Diouf væri maður að sínu skapi. „Hann er leikmaður sem andstæðingarnir og stuðningsmenn annarra liða elska að hata. Því fagna ég því að fá hann," sagði Keane.

Þessi 27 ára senegalski landsliðsmaður vildi fara frá Bolton þar sem hann hefur verið síðustu fjögur tímabil. Diouf getur spilað á vængnum eða í fremstu víglínu. Hann stóðst læknisskoðun fyrr í dag.