Diouf á djamminu skömmu fyrir leik

Enska götublaðið The Sun birti í morgun mynd sem sýndi El-Hadji Diouf, leikmann Sunderland, á skemmtistað. Blaðið segir að myndin sé tekin á fimmtudagskvöldið en á laugardaginn tapaði Sunderland 5-0 fyrir Chelsea. Diouf kom inn á sem varamaður í leiknum.

Myndin sýnir Diouf með rándýra kampavínsflösku í hendi og virðist hann skemmta sér afar vel. Tilefnið var afmæli Obafemi Martins, leikmanns Newcastle, en Diouf var á staðnum ásamt Pascal Chimbonda og Djibril Cisse sem leika einnig með Sunderland. Vitni segja hins vegar að þeir hafi ekki verið að drekka áfengi.

Blaðið heldur því fram að líklegt sé að Roy Keane, stjóri Sunderland, muni refsa Diouf fyrir athæfið.