United sagt vilja Mourinho

Breska götublaðið News of the World heldur því fram í dag að Manchester United vilji fá Jose Mourinho til starfa þegar Alex Ferguson hættir hjá félaginu.

Forráðamenn United eru sagðir hafa rætt þetta mál sín á milli en þeir telja að Ferguson muni hætta í lok næsta tímabils. Hann verður þá að nálgast 69 ára aldurinn.

Blaðið segir að mikil gagnkvæm virðing ríki á milli Ferguson og Mourinho og að sá fyrrnefndi myndi leggja blessun sína yfir það að ráða Mourinho í hans stað.

Mourinho sagði í vikunni að hann vildi gjarnan snúa aftur í ensku úrvalsdeildina einn daginn en í dag er hann knattspyrnustjóri Inter á Ítalíu.