Jenas er ánægður með Redknapp

Jermaine Jenas, varafyrirliði Tottenham, hefur nú gefið upp hver galdurinn hafi verið á bak við viðsnúning liðsins eftir að Harry Redknapp tók við.

Tottenham hefur náð í fjögur stig í leikjunum tveimur síðan Redknapp tók við og margir vilja meina að æsilegt 4-4 jafntefli liðsins við Arsenal á Emirates gæti orðið leikurinn sem hristir slenið af Tottenham í vetur.

Liðið er enn á botninum, en Jenas segir að Redknapp hafi komið brosi á leikmenn liðsins eftir að hann kom.

"Harry hefur þjappað hópnum betur saman og mér sýnist að meira að segja mennirnir sem eru ekki í liðinu séu farnir að brosa. Svona er Redknapp bara. Maður finnur fyrir nærveru hans á vellinum og í klefanum og hann hefur trú á okkur. Ég tek ekkert af Juande Ramos, en Redknapp er þekktur fyrir að ná að peppa menn upp," sagði Jenas.

"Það er mikið af ungum leikmönnum hjá Tottenham og stundum þurfa þeir bara á því að haldi að tekið sé um öxl þeirra. Harry er maðurinn í þetta. Hann hefur ekki verið lengi hérna, en hann hefur fundið sér tíma til að tala við alla leikmennina einn á einn."

Jenas skoraði glæsilegt mark í leiknum gegn Arsenal en þó úrslitin hafi verið óvæntur bónus fyrir Tottenham eftir að vera undir 4-2 á 89. mínútu, gerir Jenas sér grein fyrir að liðið eigi erfitt verkefni fram undan.

"Við erum enn í slæmri stöðu og við verðum að setja hjarta okkar og sál í hvern einasta leik."