Adebayor efast um titilvonir Arsenal

Framherjinn Emmanuel Adebayor hjá Arsenal segir morgunljóst að liðið muni ekki berjast um enska meistaratitilinn nema leikmenn taki sig verulega saman í andlitinu.

Arsenal fór illa að ráði sínu á miðvikudagskvöldið þegar það mátti sætta sig við 4-4 jafntefli við granna sína í Tottenham á heimavelli eftir að hafa ráðið ferðinni allan leikinn.

"Við verðum aldrei meistarar með svona spilamennsku. Vonbrigðin eru gríðarleg því við gerðum allt sem við þurftum til að ná í þrjú stig en fengum bara eitt. Það var mjög erfitt að kyngja þessum úrslitum því við vorum yfir 4-2 á 90. mínútu leiksins," sagði Tógómaðurinn.

Arsenal hefur ekki gengið vel gegn minni spámönnum í vetur og skemmst er að minnast taps liðsins gegn Fulham og Hull fyrr á leiktíðinni.