Bush viðurkennir að hagvöxtur verði lítill á næstunni

Bush Bandaríkjaforseti viðurkenndi í árlegri ræði á Bandaríkjaþingi í gærkvöldi að hagvöxtur yrði lítill á næstunni en sagði að til langs tíma mætti gera ráð fyrir betri tímum.

Bush er ekki vanur að gefa neitt eftir og því er tekið eftir því þegar hann staðfestir niðursveiflu í efnahagslífinu.

Bush sagði að það væri óvissuástand í efnahagsmálum; störfum væri ekki að fjölga jafn hratt og áður, þó að laun hefðu hækkað þá hefðu útgjöld fyrir bensín og mat hækkað líka. Við eldhúsborð bandarískra fjölskyldna mætti greina áhyggjur af þróun efnahagsmála. Hins vegar hélt Bush því fram að til langs tíma gætu Bandaríkjamenn verið þess fullvissir að staða hagkerfisins væri sterk.

Bush bað þingið að afgreiða fljótt útgjaldapakka sem ætlað er að vera innspýting í hagkerfið. Bush lagði áherslu á nauðsyn þess fyrir Bandaríkin að aðrir orkugjafar en jarðeldsneyti fengju meira vægi. Hann kvartaði undan kjarnorkuvæðingu Írana, þrátt fyrir nýlega skýrslu njósnastofnana um að Íranir væru ekki að reyna að koma sér upp kjarnorkuvopnum.

Hann kynnti engar nýjar áætlanir um fækkun í herjum Bandaríkjanna í Írak. Þetta var síðasta stefnuræða Bush. Nýr forseti verður kjörinn í nóvember og tekur við völdum í janúar að ári.