Zola og Donadoni vöktu hrifningu

Mike Lee, framkvæmdastjóri hjá West Ham, segir að Ítalarnir Gianfranco Zola og Roberto Donadoni hafi báðir komið afar vel út úr viðtölum sínum vegna knattspyrnustjórastöðunnar hjá félaginu.

Donadoni er fyrrum landsliðsþjálfari Ítala og Zola, sem áður lék með Chelsea á Englandi, stýrir U-21 árs liði Ítala ásamt Pierluigi Casiraghi.

Lee sagði í samtali við breska sjónvarpið að Micael Laudrup kæmi einnig vel til greina, en hann mun ræða við West Ham á morgun.

"Donadoni, Zola og svo mögulega Laudrup- eru allir mjög spennandi kostir," sagði Lee.

Hann útilokaði ekki að Slaven Bilic, fyrrum leikmaður West Ham og landsliðsþjálfari Króata væri inni í myndinni, en segir óvíst að hann geti fengið sig lausan strax.

Stefna forráðamanna West Ham sé að reyna að landa nýjum stjóra sem fyrst.