Wenger: Nauðsynlegt að vinna United

Arsene Wenger segir að það komi ekkert annað til greina hjá Arsenal en að vinna Manchester United næsta laugardag. Arsenal hefur þegar tapað þremur leikjum á leiktíðinni og virðist Wenger meðvitaður um að titilvonirnar séu að fjarlægjast.

„Ég veit ekki hvort við höfum efni á að tapa mikið fleiri leikjum, það er mjög erfitt að meta það. Við verðum að vinna okkar næsta leik til að koma okkur aftur í möguleika," sagði Wenger.

„Það er ekki hægt að fá betri leik en gegn Manchester United til að fá sjálfstraust í liðið og koma okkur á beinu brautina. Þarna fáum við líka tækifæri til að sýna gagnrýnendum hvað við getum."