Schuster ánægður með sína menn

Bernd Schuster, þjálfari Real Madrid, sagðist ánægður með baráttu sinna manna þrátt fyrir tapið gegn Roma í Meistaradeildinni í kvöld. Real lék með 10 menn síðustu 19 mínúturnar eftir að Pepe var vikið af velli.

"Þegar tekið er mið af því hve sterkt lið við vorum að spila við, get ég ekki beðið um meira en strákarnir sýndu í kvöld. Þeir urðu að spila manni færri og sýndu gríðarlegan karakter þegar þeir reyndu að jafna. Þeir trúðu því að þeir gætu unnið leikinn," sagði Schuster brattur þrátt fyrir að vera úr leik í Evrópukeppninni.