Redknapp vill fá Ferdinand

Harry Redknapp, stjóri Tottenham, segir að hann ætli sér að ráða Les Ferdinand sem þjálfara hjá félaginu.

Redknapp hefur þegar ráðið Tim Sherwood sem þjálfara í hlutastarfi og vill fá Ferdinand til liðs við sig.

„Ég ætla að ræða við Les. Ég vil fá hann til að þjálfa og vinna með framherjum okkar. Ég held að hann geti veitt þeim mikla aðstoð," sagði Redknapp.

Síðan að Redknapp tók við Tottenham fyrir tíu dögum síðan hefur liðið unnið bæði Bolton og Liverpool sem og náð ótrúlegu 4-4 jafntefli gegn Arsenal.

Ferdinand lék með Tottenham á árunum 1997 til 2003 og skoraði þá 33 mörk í 118 leikjum með félaginu.