Redknapp til Tottenham í stað Ramos

Juande Ramos var í gærkvöldi rekinn úr starfi knattspyrnustjóra hjá Tottenham og skömmu síðar var Harry Redknapp ráðinn í stöðuna. Hann hættir því hjá Portsmouth.

Forráðamenn Tottenham ákváðu einnig að víkja þeim Damien Comolli, yfirmanni íþróttamála, auk þjálfaranna Gus Poyet og Marcos Alvarez.

Eftir því sem Redknapp segir fær Portsmouth um fimm milljónir punda fyrir að leysa sig undan samningi sínum við félagið.

„Þetta er frábært tækifæri til að stýra stórum klúbbi áður en ég hætti þjálfun," sagði Redknapp sem er 61 árs gamall.

Tottenham hefur gengið skelfilega það sem af er tímabilinu og aðeins fengið tvö stig úr fyrstu átta leikjunum. Liðið tapaði einnig fyrir Udinese í UEFA-bikarkeppninni í vikunni.

Daniel Levy, stjórnarformaður Tottenham, sendi frá sér yfirlýsingu um málið í morgun.

„Ég hef þurft að taka nokkrar mjög erfiðar ákvarðanir. Það var ekki auðvelt að segja knattspyrnustjóranum og aðstoðarmönnum þeirra upp störfum."

„Hins vegar komust ég og stjórnin að þessari niðurstöðu þar sem liðið hefur aðeins unnið þrjá deildarleiki síðan við unnum deildarbikarkeppnina í febrúar og auk þess byrjað skelfilega í deildinni í haust."

Levy boðaði breytta tíma í stjórn liðsins og sagði ljóst að kunnátta Redknapp á leikmannamarkaðnum kæmi félaginu að góðum notum þegar félagaskiptaglugginn opnar um næstu áramót.

„Stjórnarformaðurinn veit vel að við þurfum að bæta okkur á nokkrum sviðum og er ég að skoða þá möguleika sem okkur standa til boða," sagði Redknapp. „Hins vegar er aðalatriðið að fá það mesta sem við getum úr þeim leikmönnum sem eru fyrir hjá félaginu. Þeir eru nokkrir góðir sem hafa ekki staðið sig eins vel og þeir geta."

„Ef þeir spila eins og þeir eiga að sér þá hef ég engar áhyggjur."

Redknapp sagði einnig að það hefði verið erfitt að fara frá Portsmouth en að Tottenham hafi gert félaginu sem hefði verið erfitt að hafna.

„Félagið gat ekki selt neinn leikmann í félagaskiptaglugganum þannig að það ákvað að selja knattspyrnustjórann," sagði Redknapp.

Miklar breytingar hafa verið gerðar á leikmannahópi Tottenham á þessu ári. Robbie Keane, Dimitar Berbatov og Jermain Defoe voru allir seldir og þá keypti Ramos leikmenn fyrir um 60 milljónir punda í sumar. Þeirra á meðal eru Luka Modric, David Bentley, Roman Pavlyuchenko og Heurelho Gomes.

Hermann Hreiðarsson er á mála hjá Portsmouth.