Ferguson kemur leikmönnum sínum til varnar

Sir Alex Ferguson, stjóri Manchester United, segir að leikur sinna manna gegn Chelsea hafi ekki verið grófur þó svo að sjö leikmenn United hafi fengið áminningu í leiknum.

Hann neitaði þó að tjá sig um frammistöðu Mike Riley, dómara leiksins. „Þetta var hörkuleikur en mér fannst ekki vera ein slæm tækling í leiknum," sagði Ferguson.

„Það hafa ýmsir verið að ræða um hvað hafi verið á seyði en það er erfitt að segja eitthvað um dómarann. Ég vil ekki blanda mér í það."

Enska knattspyrnusambandið mun nú rannsaka hegðun United í leiknum eins og alltaf þegar eitt lið fær minnst sex áminningar í einum leik.