Eftirminnilegasti leikurinn 5-3 sigur á Tottenham

Sir Alex Ferguson fagnar á fimmtudaginn 22 ára starfsafmæli hjá Manchester United. Hann segir að eftirminnilegasti leikurinn á ferlinum sé 5-3 sigur liðsins á Tottenham í september 2001.

Þetta segir hann þrátt fyrir að félagið hafi tvívegis orðið Evrópumeistari en báðir úrslitaleikir voru dramatískir. Fyrst vann United 2-1 sigur á Bayern München árið 1999 með tveimur mörkum undir lok leiksins og svo sigur á Chelsea í vítaspyrnukeppni í vor.

„Sá leikur sem stendur upp úr í minningunni er þegar við vorum á White Hart Lane í september árið 2001," sagði Ferguson. „Við vorum 3-0 undir í hálfleik en unnum svo leikinn 5-3. Það var ótrúlegur viðsnúningur á leiknum og stuðningsmenn okkar áttu sinn þátt í því."

Hann segist stoltastur af því þegar að United vann enska meistaratitilinn í fyrsta sinn í 26 ár árið 1993.

„Það var afar ánægjulegt að verða meistari í fyrsta skiptið. Það var byrjunin á því sem við verðum vitni að í dag. En það var auðvitað frábær árangur að verða Evrópumeistari."

Sem fyrr segir komst Tottenham 3-0 yfir í fyrri hálfleik í umræddum leik en þeir Andy Cole, Laurent Blanc, Ruud van Nistelrooy, Juan Sebastian Veron og David Beckham skoruðu svo mörk United í síðari hálfleik.