David Winnie mælir með Guðjóni

David Winnie, fyrrum leikmaður og þjálfari KR, segir að Guðjón Þórðarson sé rétti maðurinn til að gera Hearts samkeppnishæft við Rangers og Celtic.

Winnie lék einnig með Hearts á sínum tíma en hann starfar nú sem lögfræðingur í Lundúnum. „Mér þætti það frábært ef Hearts gæti rofið einokun Rangers og Celtic og Guðjón gæti verið rétti maðurinn til þess," sagði Winnie í samtali við Daily Record í Skotlandi í dag.

„Ef það er rétt að Terry Butcher yrði aðstoðarmaður hans gætu þeir myndað afar frambærilegt þjálfarateymi. Guðjón býr yfir mikilli reynslu og hefur gengið vel hjá ÍA. Hann varð einnig bikarmeistari með KR og komst nálægt því að koma Íslandi á EM í fótbolta þegar hann varð landsliðsþjálfari."

„Honum gekk misvel hjá Stoke og Notts County en hann kann sitt fag. Ef hann tíma og svigrúm hjá Hearts gæti honum gengið vel þar."

„En það þýðir ekkert að bulla í Guðjóni. Hann getur verið mjög hviklyndur og er með stórt og mikið orðspor á sér á Íslandi. Það er hans leið eða engin önnur. Það myndi aldrei þýða að skipta sér af liðsvali hans. Það er stranglega bannað."