Ferguson: Fletcher vildi fara

Sir Alex Ferguson segir að sér hafi létt stórum í sumar þegar hann náði að telja skoska miðjumanninn Darren Fletcher af því að fara frá Manchester United.

Fletcher er 24 ára gamall og er fyrirliði skoska landsliðsins. Hann hefur verið hjá United síðan hann var unglingur, en hefur aldrei átt fast sæti í liðinu. Hann skrifaði undir langtímasamning við United í sumar eftir að stjórinn talaði hann til.

"Það var líklega mesti léttir sem ég fann fyrir í sumar þegar Fletcher skrifaði undir. Það voru mörg lið að reyna að kaupa hann og hann vildi fá að spila meira," sagði Ferguson.

"Ég benti honum á að hann hefði verið alinn upp hjá þessu félagi og að hann hefði fengið að spila alla stóru leikina þangað til hann meiddist í febrúar. Þegar hann svo kom til baka úr meiðslunum, spilaði hann stóra leiki eins og gegn Chelsea úti og gegn Barcelona í Meistaradeildinni," sagði Ferguson og hrósaði landa sínum.

"Darren spilaði í öllum stóru leikjunum og ég náði að fá hann til að vera áfram. Það hefur enda komið í ljós í öllum meiðslunum að hann er okkur gríðarlega mikilvægur. Hann er alltaf að bæta sig og hefur verið frábær í stóru leikjunum," sagði Ferguson í samtali við Sun.