Deco ánægður með að hafa valið Chelsea

Deco segist ánægður með að hafa valið að ganga til liðs við Chelsea í sumar frekar en Inter sem var einnig að sækjast eftir starfskröftum hans.

Jose Mourinho er stjóri Inter en Deco lék áður undir stjórn Mourinho hjá Porto. Deco leikur einnig með portúgalska landsliðinu en fyrrum landsliðsþjálfari Portúgals, Luiz Felipe Scolari, er knattspyrnustjóri Chelsea.

„Felipe er mjög alvörugefinn maður sem er ekki mikið gefinn fyrir brandara, ekki einu sinni í góðra vina hópi. En hann er mikill fagmaður og góð persóna," sagði Deco.

„Eftir að ég hafði skoðað hvað félögin hefðu upp á að bjóða fannst mér Chelsea henta mér betur. Sú áskorun var athyglisverðari."

„Bæði Mourinho og Scolari hafa sínar starfsaðferðir. Mourinho getur virst hrokafullur úr fjarska en hann er mikill fagmaður sem hefur mikinn skilning á leikmönnum sínum."