Norski olíusjóðurinn er fyrirmynd alþjóðlegra fjárfesta

"Siðareglur norska olíusjóðsins hafa haft mikil áhrif á fjárfesta víða um heim þegar kemur að fjárfestingum í fyrirtækjum. Við vitum að margir fjárfestar í Evrópu, Bandaríkjunum og í Kanada, taka sjóðinn til fyrirmyndar". Þetta kom fram á ráðstefnu norska fjármálaráðuneytisins sem haldin var í Osló í gær, undir yfirskriftinni Fjárfest í framtíðinni.

Olíusjóður Norðmanna er stærsti lífeyrissjóður í heiminum, en hann hljóðar upp á rúmlega 20.000 milljarða íslenskra króna og er ætlað að standa straum af lífeyrisskuldbindingum komandi kynslóða.

"Markmiðið sjóðsins er vitaskuld að græða pening, en á sama tíma er brýnt að fjárfesta ekki í fyrirtækjum sem stríða gegn siðareglunum. Við viljum tryggja að peningarnir sem tilheyra norsku þjóðinni séu ekki notaðir í vafasömum tilgangi. Þegar við ákveðum að útiloka fyrirtæki frá sjóðnum, eins og til dæmis bandaríska fyrirtækið Walmart, vegna stórfelldra brota á vinnurétti starfsmanna þess í þróunarríkjunum, þá hefur það mikil áhrif á alþjóðamörkuðum, enda stærð og markaðsvirði olíusjóðsins gríðarlegt. Siðareglurnar stuðla að því að lyfta viðskiptasiðferði fyrirtækja á hærra plan og kannski breyta heiminum örlítið til hins betra í leiðinni," sagði Gro Nystuen, formaður siðanefndar norska olíusjóðsins.