Ísland stendur sterkt þrátt fyrir að hafa ekki náð kjöri

Geir H. Haarde forsætisráðherra segir Ísland standi sterkt þrátt fyrir að landið hafi ekki náð kjöri í öryggisráð Sameinuðu þjóðanna í dag. Geir ræddi við blaðamenn eftir fund sinn með Yves Leterme, forsætisráðherra Belgíu, þar sem efnahagserfiðleikarnir á Íslandi voru til umræðu og möguleg aðstoð Belga.

Geir sagði að það væru vissulega vonbrigði að Íslendingar hefðu ekki náð kjöri í öryggisráðið en að landið stæði sterkt eftir því unnið hefði verið vel að framboðinu og Ísland hefði verið mikið í sviðsljósinu um allan heim.

Hann taldi ekki að þeim peningum hefði verið illa varið sem farið hefðu í framboðið enda væru það smáar upphæðir hlutfallslega miðað við það sem aðrar þjóðir hefðu lagt í framboðið. Um það hvort Ísland myndi sækjast aftur eftir sæti í öryggisráðinu sagði Geir að það væri hefð fyrir því að norrænu þjóðirnar sæktust eftir sæti á fjögurra ára fresti og skiptust þannig á. Það kæmi því ekki að Íslandi aftur fyrr eftir 20 ár og sagðist hann að það yrði líklega ekki í hans verkahring að taka ákvörðun þar um.

Um viðræðurnar við Leterme sagði Geir að þær hefðu verið vinsamlegar en engar ákvarðanir hefðu verið teknar á fundinum. Leterme sagði að Evrópusambandið styddi heilshugar aðgerðir íslenskra stjórnvalda í efnahagserfiðleikunum og væri boðið og búið til þess að gera það sem í þess valdi stæði til að auðvelda Íslendingum baráttuna.