Ronaldo: Rökrétt að ég fái gullknöttinn

Cristiano Ronaldo hjá Manchester United segir að það yrði rökrétt ef hann yrði sæmdur gullknettinum í vetur. Það eru verðlaun franska tímaritsins France Football til handa knattspyrnumanni Evrópu á ári hverju.

Ronaldo sat fyrir svörum í franska blaðinu L´Equipe og taldi þar upp á hverju hann byggði kenningar sínar.

"Ég held að það væri rökrétt að ég fengi gullskóinn. Það er mín skoðun. Það eru nokkrir menn sem koma til greina en að minu mati er sigurvegarinn sá sem hefur sýnt hvað stöðugastan leik á árinu," sagði Ronaldo.

"Ég var mjög stöðugur. Ég vann ensku deildina, meistaradeildina og var markahæsti leikmaður Evrópu og meistaradeildarinnar," sagði Portúgalinn.

Ronaldo var valinn leikmaður ársins af íþróttafréttamönnum og leikmannasamtökunum á Englandi á síðasta ári, en varð í öðru sæti á eftir Kaka þegar kom að gullknettinum.