Wenger: Nauðsynlegur sigur

Arsene Wenger sagði að sigur sinna manna í Arsenal gegn Manchester United hafi verið nauðsynlegur upp á framhaldið að gera.

Samri Nasri skoraði bæði mörk Arsenal í 2-1 sigri en Rafael Da Silva minnkaði muninn fyrir United undir lok leiksins.

Arsenal hefur gengið fremur illa upp á síðkastið og spjótin beinst að Wenger í fjölmiðlum. „Ég get tekið gagnrýninni. Það er hluti af starfinu. En það er bara ein leið til að svara gagnrýninni og það er inn á vellinum."

„Auðvitað var nauðsynlegt að vinna þennan leik. Þetta var fyrst og fremst frábær fótboltaleikur þar sem bæði lið lögðu allt í sölurnar."

„Manchester United er með frábært lið og sköpuðu sér færi sem leikmenn nýttu sér ekki. En við nýttum okkar færi vel."

„Þeir tóku frumkvæðið eftir að hafa lent 2-0 undir. Markið þeirra kom seint og þetta voru mjög taugastrekkjandi lokamínútur. En við reyndum að halda áfram og skora þriðja markið. Ég er ánægður með mína menn, þeir stóðu sig vel."