Vidic: Erum í frábæru standi

Manchester United vann Portsmouth 2-1 í æfingaleik í Nígeríu í gær. Chris Eagles og Carlos Tevez skoruðu mörk United en Jermain Defoe fyrir Portsmouth. Hermann Hreiðarsson lék fyrri hálfleikinn.

Nemanja Vidic, varnarmaður Manchester United, segist virkilega ánægður með ástandið á liðinu.

„Það er aldrei of snemmt að komast í gott form. Við höfum leikið vel á undirbúningstímabilinu og allt lítur vel út," sagði Vidic.

„Við lékum góða leiki í Suður-Afríku og erum ánægðir með útkomuna þar. Við erum í frábæru standi og það verður enn betra með hverjum degi. Það eru enn nokkrar vikur í mót en við erum að verða tilbúnir."

Vidic hefur myndað ógnarsterkt miðvarðarpar með Rio Ferdinand síðustu tvö tímabil en á undirbúningstímabilinu hefur hann leikið við hlið yngri leikmanna.