Framleiða álvír í Reyðarfirði

Framleiðsla er hafin á álvírum í steypuskála Alcoa Fjarðaáls í Reyðarfirði en þá á að nota í hásprennustrengi líka þeim sem flytja raforku frá Kárahnjúkavirkjun að álverinu.

Fram kemur í tilkynningu frá Alcoa að fjórðungur álframleiðsunnar í Reyðarfirði verði til framleiðslu á álvírum, allt að 90 þúsund tonn af vír á ári hverju. Fyrstu gámarnir með vírum fara utan í næstu viku.

Gangsetning álversins er að verða lokið og reiknað er með að starfsemin verði komin í nokkuð fastar skorður í lok ársins. Þegar framleiðslan er komin í fullan gang mun útflutningsverðmæti framleiðslu Fjarðaáls nema um 60-70 milljörðum króna á ári, miðað við álverð og gengi gjaldmiðla eins og það er nú, segir í tilkynningu Fjarðaáls.