Bílbelti gætu fækkað banaslysum um 20%

Talið er að fækka mætti banaslysum í umferðinni um 20% og alvarlegum umferðarslysum verulega ef allir notuðu bílbelti.

Umferðarstofa og Rannsóknarnefnd Umferðarslysa hafa miklar áhyggjur af þeim fjölda alvarlegra umferðarslysa sem orðið hafa að undanförnu af völdum þess að öryggisbelti eru ekki notuð, að því er segir í tilkynningu um málið.

Eitt margra alvarlegra dæma um þetta er banaslysið sem varð á Reykjanesbraut s.l. laugardagskvöld. Ökumaður, sem allt bendir til að hafi ekki verið í öryggisbelti, kastaðist út úr bílnum með fyrrgreindum afleiðingum eftir árekstur við ljósastaur. Flest bendir til þess að koma hefði mátt í veg fyrir alvarlegar afleiðingar slysins með því einu að öryggisbelti hefði verið notað.

Hinsvegar eru til fjöldamörg dæmi um það hvernig öryggisbelti bjarga fólki. Þetta vita þeir sem vinna að umferðaröryggismálum og hafa m.a. þann starfa að greina orsakir slysa og afleiðingar.