Björguðu átta manns af flutningaskipi

Breskum þyrluflugmönnum tókst að bjarga fimm farþegum og þremur slösuðum skipverjum af flutningaskipi á Írlandshafi í morgun. Frystiskipið var í ólgusjó þegar þyrluflugmen breska flughersins komu að því. Þeim tókst að hífa fólkið um borð og fara með hina slösuðu á spítala.

Í gær mistókst að ná í fólkið vegna brælu. Þrír menn meiddust á meðan þeir biðu eftir björgun, þar á meðal skipstjórinn, sem er með alvarlegan mænuskaða. Níutíu gámar fóru í hafið þegar veðrið var sem verst í gær en nú síðdegis var skipið á leið til hafnar í ágætu veðri.

Brúðhjón í brúðkaupsferð voru á meðal þeirra sem bjargað var, en maðurinn var fluttur á sjúkrahús ásamt skipstjóranum, þó ekki alvarlega slasaður.