Uppreisnarmenn í Tsjad berjast í höfuðborginni

Þúsundir Tsjadneskra uppreisnarmanna fóru inn í höfuðborg Tsjad, N´Djamena, í dag og sækja nú að forsetahöllinni. Miklar skothríðir hafa heyrst í miðborginni og vitni segja skriðdreka brenna á götum úti.

Utanríkisráðherra landsins sagði að Idriss Deby forseti væri inni í höllinni og sagði yfirvöld hafa hemil á ástandinu í borginni.

Utanríkisráðuneyti Frakklands fordæmdi tilraun uppreisnamanna til að ná völdum með vopnum. Ríkisstjórnir Tsjad og Súdan saka hvor aðra um að styða uppreisnamenn í löndum sínum. Uppreisnarmennirnir hófu atlögu sína skammt frá landamærum Súdan fyrr í vikunni.

Frönsk yfirvöld hafa varað franska ríkisborgara í Tsjad við því að fara út úr húsum, þvert á fyrri yfirlýsingar um að koma saman á brottflutningsstöðum.

Afríkubandalagið hefur einnig hótað uppreisnarmönnum því að Tsjad verði úthýst úr bandalaginu ef þeir nái völdum.