Ólöglegar öryggismyndavélar á norskum skemmtistöðum

Ný skýrsla norsku persónuverndarinnar leiðir í ljós að skemmtistaðir í Noregi starfrækja þétt net öyrggismyndavéla, sem í sumum tilvikum eru ólöglegar. Skoðaðir voru átta staðir í Ósló, Stavanger og Þrándheimi. Þeir voru með samstals fimmtíu öryggismyndavélar sem fylgdust með gestum í öllum skúmaskotum bæði innandyra og utan.

Sumar vélarnar voru þannig stilltar að þær gátu súmmað inn á gestina og voru jafnvel tengdar við Netið.

Norska persónuverndin segir að ólöglegt sé að vera með öryggismyndavélar þar sem það sé ekki nauðsynlegt vegna öryggis gestanna.

Einn staðurinn, Rick's Cafe í Þrándheimi var með 26 myndavélar, eða fleiri en allir hinir samanlagt.