Dómsdagshvelfingin á Svalbarða vígð í dag

Hin svokallaða dómsdagshvelfing á Svalbarða, sem getur geymt milljónir frætegunda, var formlega vígð í dag. Þar er um að ræða fræ mikilvægra plantna frá heiminum öllum og verða þau geymd í hvelfingunni sem djúpt í jörðu.

Fram kemur í frétt Norðurlandaráðs að líffræðilegur fjölbreytileiki eigi undir högg að sækja, ekki síst vegna aukinna loftslagsbreytinga. Náttúruhamfarir gætu orðið afdrifaríkar fyrir plöntuauðlindir jarðar en með öryggisgeymslunum á Svalbarða verði tryggt að þurrkar og flóð útrými ekki mikilvægum tegundum.

Frægeymslan á Svalbarða er í raun þrír hellar sem sprengdir eru rúmlega hundrað metra niður í bjargið. Norðmenn byggðu og eiga geymslurnar en Norræna ráðherranefndin tekur virkan þátt í starfinu. Norræna stofnunin NordGen, sem vinnur að verndun erfðaauðlinda, mun sjá um rekstur geymslunnar.

„Staðsetning geymslunnar er eins hagstæð og hugsast getur með tilliti til geymslu plöntufræja. Sífrerinn og staðsetning geymslunnar langt niður í iðrum jarðar tryggir að fræin haldast frosin, jafnvel þó að rafmagnslaust verði," segir í frétt Norðurlandaráðs.