Segist ekki hafa ógnað starfsöryggi Helgu Völu

Vísir sagði frá því fyrr í dag að Björn Bjarnason hefði tekið Helgu Völu Helgadóttur fyrrverandi útvarpskonu á beinið vegna umfjöllunar í Speglinum á Rás 2. Helga Vala greindi frá því á bloggsíðu sinni að Björn hefði eitt sinn hringt í sig en undir niðri hefði vissulega legið að hann hefði völd til þess að láta hana fara. Björn segist ekki minnast þessa atviks.

„Ég minnist ekki þessa atviks en veit, að sem menntamálaráðherra ræddi ég aldrei við starfsmenn RÚV á þeim nótum, að þeir ættu atvinnu sína undir mér. Ég ræði raunar almennt ekki þannig við fólk og síst af öllu þá, sem eru ekki ráðnir til starfa af mér," segir Björn í svari sem hann sendi Vísi vegna málsins.

Helga Vala skrifar á bloggi sínu að Björn hefði benti sér á að hún skyldi vara sig á umfjöllun sem gagnrýndi stjórnvöld enda starfaði hún hjá ríkisfjölmiðli.

„Ósætti mitt við efnistök í Speglinum fóru ekki fram hjá neinum, sem á því höfðu áhuga og nægir í því efni að vísa til þess, sem ég hef ritað um það á vefsíðu mina bjorn.is. Starfsmenn Spegilsins sökuðu mig opinberlega um rógburð á þessum árum og í áranna rás hafa þeir sárasjaldan leitað álits hjá mér á mönnum og málefnum," segir Björn í svarinu.

„Mér þykir miður, ef Helga Vala hefur fengið svona erfiða bakþanka af samtali við mig og get fullvissað hana um, að hún hefði getað losað sig við þá fyrr með því að hreyfa málinu opinberlega eða í samtali við mig."