Viðskiptamógúlar og fjölmiðlafólk flykkist á sjó

Óvenju mikill áhugi er þessa dagana á skipstjórnarréttindum, og flykkjast íslendingar sem aldrei fyrr í pungapróf. „Ég hef nú alltaf lagt mig í líma að muna nöfn á nemendunum, en ég sá fram á það núna að ná því ekki," segir Kjartan Örn Kjartansson, kennari á skipstjórnarsviði Fjöltækniskóla Íslands, en í vetur útskrifast þaðan 550 nýir skipperar.

Á venjulegu ári væri þessa tala nær hundrað en aukninguna segir Kjartan að megi rekja til breytinga sem urðu um áramót á þeim réttindum sem pungaprófið veitir.

Gamla prófið veitti fólki réttindi á 30 brúttólesta skip. Nýja prófið er háð lengd skipanna, og mega þeir sem hófu námið eftir áramót ekki stýra skipi sem er lengra en tólf metrar að lengd. Kjartan segir þetta vissulega þýða einhverja rýrnun á réttindum. Þau nýju séu þó feikinóg til daglegs brúks, en eðlilega vilji fólk fá eins mikil réttindi og það geti.

Fjöldi þekktra Íslendinga er meðal þeirra sem langar að míga í saltan sjó. Þar má telja parið Róbert Marshall, aðstoðarmann samgönguráðherra, og Brynhildi Ólafsdóttur, fjölmiðlafulltrúa Saga Capital. Það ku vera fleiri frá Saga Capital í náminu, þar á meðal Þorvaldur Lúðvík Sigurjónsson, forstjóri fyritækisins.

Fréttamaðurinn Gissur Sigurðsson útskrifaðist skömmu fyrir jól og kollegi hans Haukur Holm klárar námið á næstunni. Það gera þeir Georg Lárusson, forstjóri Landhelgisgæslunnar, Skarphéðinn Berg Steinarson fyrrverandi stjórnarmaður hjá 365, og Hreggviður Jónsson, forstjóri Vistor, einnig. Þá mun Karl Wernersson, stjórnarformaður Milestone, hafa útskrifast í fyrra.