Zola eða Donadoni?

Enskir fjölmiðlar telja að valið hjá West Ham standi milli Gianfranco Zola og Roberto Donadoni. Félagið er í leit að knattspyrnustjóra í stað Alan Curbishley sem lét af störfum í síðustu viku.

„Ég tel að West Ham séu nú með tvo menn á blaði hjá sér og þeir eru báðir mjög góðir kostir," sagði Kia Joorabchian við Sky en hann er sérlegur ráðgjafi stjórnar félagsins.

Veðbankar telja líklegast að Zola verði ráðinn en þessi fyrrum goðsögn hjá Chelsea og annar þjálfari ítalska U21 landsliðsins hefur verið í viðræðum við West Ham. Joorabchian telur Donadoni alveg jafn hæfan.

„Donadoni var með ítalska landsliðið og hefur mikla reynslu sem leikmaður," sagði Joorabchian sem telur að gengið verði frá ráðningu á næstu tveimur sólarhringum.